Art & Kulturë

Miratohet projekti për restaurimin e 18 banesave ‘muze’ në Gjirokastër

Në mbledhjen e fundit të KKR-së, u morr vendimi për rijetëzimin e 18 banesave në qytetin e Gjirokastrës.

Në listën e shtëpive që do të restaurohen bëjnë pjesë edhe disa ndër më të përfolurat për gjendjen e tyre të mjerueshme, si: banesa e Kabilatëve, banesa Çano, Lolomani, Skënduli etj, të cilat do t’i nënshtrohen një ndryshimi tërësor sipas projekteve specifike për secilën prej tyre.

Nga seria e banesave që do të restaurohen si banesat Kabilatët; Zeko; Lolomani; Batha; Skënduli; Kokobobo; Gurgai ; banesa Ҫano dhe Ish-Radio, janë pjesë e projektit “Shtëpitë e Shkrimtarëve”, një projekt i cili parashikon ndërhyrje në strukturën e brendshme dhe të jashtme të këtyre banesave të trashëgimisë materiale, për të evidentuar dhe konservuar vlerat historike dhe artistike të tyre, bazuar në modelin e shtëpisë së Kadaresë.

Përveç banesave që janë pjesë e projektit “Shtëpitë e Shkrimtarëve”, KKR miratoi edhe projektet e restaurimit dhe rehabilitimit të fasadave në lagjen Hazmurat dhe Pazari i Vjetër në Gjirokastër për banesat, “Avdi Bozgo”, “Familja Aliko” , “Zapanaja Alimatët”, “Pajtim Ahmeti” , “Hirov Spahiu”, “Vëllazëria Dudumi”, “Kamberi dhe Krongo” , “Familjes Jaupi”, “Familjes e Sevo Caro”.

Hartimi i projekteve restauruese për këto shtëpi është një tjetër hap i rëndësishëm i politikave të Ministrisë së kulturës dhe IMK për rijetëzimin tërësor të Gjirokastrës, pas përfundimit të disa projekteve të tjera të mëdha si ai për restaurimin e Qafës së Pazarit.

Leave a reply

InfoKult jep informacion 360 gradë për të kaluar kohën e lirë sa i takon artit, kulturës dhe turizmit (në kuptimin e destinacioneve turistike).