Me Charlize Theron, Amanda Seyfried dhe Joel Edgerton, “Gringo” vjen premierë në kinematë Imperial, Millenium dhe Cineplexx më 29 mars.
Ky film është një komedi e zezë që ndërthur aksionin dhe intrigën, teksa tregon historinë e luftës për mbijetesë të biznesmenit Harold Soyinka, i cili kthehet nga një qytetar që respekton ligjin, në një kriminel në kërkim.
“Ready Player One” është filmi më i fundit i regjisorit të famshëm Steven Spielberg, i cili do të mbërrijë në kinematë e kryeqytetit më 29 mars.
Spielberg nuk zhgënjen edhe këtë herë! “Ready Player One” do t’ju çojë në një aventurë të paimagjinueshme: Krijuesi i botës virtuale “Oasis” ndërron jetë dhe menjëherë pas vdekjes së tij, publikohet një video ku ai sfidon të gjithë përdoruesit e kësaj bote virtuale që të gjejnë vezën e tij të pashkëve. Triumfuesi do të ketë edhe një çmim fitues. Personazhi kryesor i filmit, Wade Watts, gjen rastësisht të dhënën e parë dhe aty do të nisi kërkimin për vezën e pashkëve.
“You Were Never Really Here”, tregon historinë e një veterani lufte, Joe, i cili ka si profesion gjetjen e vajzave të zhdukura. Megjithatë, kur një punë i del jashtë kontrollit, ëndrrat më të këqija të Joe bëhen realitet. Ai niset në një rrugëtim që mund ta çojë drejt vdekjes ose në rizgjimin e temperamentit të tij të egër dhe traumave që ka kaluar gjatë shërbimit në luftë.
Ky film do të shfaqet që prej datës 29 mars në kinemanë Imperial.
