Në kuadër të aktiviteteve të Akademisë së të Rinjve për vitin 2019-2020, ditën e martë, dt. 3 shtator, ora 11.00, në sallën “Aleks Buda”, me mbështetjen e Akademisë së Shkencave të Shqipërisë, do të organizohet prezantimi i librit “SHËNIME PËR MUZIKANTIN”, me autor kompozitorin Markelian Kapidani.
Do të flasin:
Markelian Kapidani (kompozitor/pianist)
Mikaela Minga (Akademia e të Rinjve – Akademia e Shkencave e Shqipërisë/Instituti i Antropologjisë Kulturore dhe Studimit të Artit)
Florian Jakaj (Kryetar i Shoqatës Kulturore “Rrok Jakaj”)
Libri “Shënime për muzikantin” i Markelian Kapidanit sjell një ndër kontributet e para teorike në shqip mbi muzikën #jazz. Ai fokusohet në disa linja: tek aspektet teorike dhe praktike të muzikës jazz; te proceset që kanë të bëjnë sa me improvizimin/krijimtarinë, aq edhe me interpretimin; si dhe tek principet e brendshme të organizimit të kësaj muzike, të kombinuara me përvojat dëgjimore.
Vijnë përmes këtij libri reflektimet e një kompozitori dhe performuesi i cili e ka afirmuar tashmë profilin e vet individual brenda botës muzikore jazz. Duke i konceptuar modestisht në formën e shënimeve, Kapidani iu adresohet studentëve dhe gjithë atyre që kërkojnë të thellohen në mënyrë më sistematike te kjo muzikë, për ta njohur, luajtur dhe krijuar. Ndërkaq, ky libër është rezultat i përvojës së gjatë të Kapidanit në botën e jazz-it dhe jo vetëm, përvojë që modestisht, por me shumë integritet, e përcjell tek lexuesi.
