E ndërtuar që në kohën e mesjetës, Katedralja “Notre-Dame” është kthyer në një simbol historik të qytetit të Parisit dhe ndër vite ka qenë dhe është një atraksion për të gjithë turistët.
Por së fundmi, Kisha Katolike e Francës ka paralajmëruar për rrezikshmërinë që i kanoset këtij monumenti madhështor.
Disa pjesë të katedrales 850 vjeçare kanë filluar të bien si pasojë e pluhurit dhe papastërtive që po shkërmoqin pak nga pak gurin e ndërtesës.
Nga frika e një shembje të mundshme, Kisha ka lëshuar një thirrje urgjente për mbledhjen e fondeve që do të përdoren për të shpëtuar katedralen e famshme.
Për restaurimin e plotë të saj duhen rreth 150 milion euro, ndaj donacionet mund të vijnë nga çdo qytetar i globit, pasi siç thotë edhe drejtori i Katedrales “Notre- Dame është një pasuri e gjithë Tokës, jo vetëm e Francës apo e Parisit”.
