Ditën e djeshme në ambientet e Teatrit Kombëtar, është mbajtur protesta e rradhës nga artistët dhe shoqëria civile mbi ndërtimin e Teatrit të ri Kombëtar.
Gjatë këtij debati, artistët kanë prezantuar projektin e tyre mbi TK, i cili ruan godinën e teatrit ekzistues nga prishja dhe kundërshton projektin e qeverisë që parashikon shembjen e godinës ekzistuese dhe krijimin e një ndërtese të re.
Nga ky projekt, del se Teatri i ri do të përmbajë 4 kate dhe do të pajiset me të gjitha parametrat e duhura për një institucion të tillë.
“Teatri i rikonstruktuar do jetë me 4 kate dhe do te ketë 2 hyrje. Veshja e jashtme e teatrit do jetë prej metali e xhami. Kostoja mund të shkojë deri në 10 milionë euro bashkë me rikonstruksionin. Salla do jetë me sistem të kondiconuar dhe me të gjitha parametrat”- thuhet në prezantimin e projektit nga artistët shqiptarë.
Në fjalën që mbajti, Përparim Kabo është shprehur se artistët janë kundër shembjes së godinës së Teatrit, pasi ajo është tempulli i qytetit dhe kulturës kombëtare.
“Kjo godinë nuk duhet shembur, pasi kjo godinë është tempulli i qytetit dhe kultura kombëtare. Këtu është memorja kombëtare dhe njerëzit janë bërë më të mirë. A e dini ju zotërinj parlamentarë se çfarë tha një grua që pa një shfaqje këtu: ‘Po ta kisha parë më parë këtë shfaqje nuk do ta kisha vrarë burrin. Nëse kjo godinë shembet, unë e them sot që kjo shembje është bërë nga ministrja Mirela Kumbaro dhe kryeministri Edi Rama. Projekti që na u paraqit sot ishte një vlerë kombëtare, ku ruhen godinat e ekzistuese”- u shpreh Kabo.
