Art & Kulturë

Liqeni i Lasgushit e i poezive të dashurisë në provën e miratimit nga UNESCO

Shqipëria ka dorëzuar ditën e djeshme Dosjen e Kandidimit të rajonit të Liqenit të Ohrit si Trashëgimi Natyrore dhe Kulturore në Listën e Trashëgimisë Botërore.

Lajmin për këtë e ka bërë me dije numri një i Ministrisë së Turizmit dhe Mjedisit në Shqipëri, Blendi Klosi.

Ai ka thënë se pas një pune të gjatë përgatitore, e gjithë dosja voluminoze, me vlerat e pamohueshme natyrore dhe kulturore të liqenit është tashmë në Qendrën e UNESCO-s në Paris, në pritje të miratimit nga Komiteti i Trashëgimisë Botërore.

“Liqeni i Lasgushit, poezive të dashurisë dhe natyrës piktoreske në çdo stinë, me pasuritë e tij natyrore dhe kulturore është tashmë në sprovën e trashëgimisë botërore të UNESCO-s! Përgatitja e dosjes nga ministria e Turizmit dhe Mjedisit u realizua nëpërmjet një procesi gjithëpërfshirës në bashkëpunim të ngushtë me Ministrinë e Kulturës, ekspertët e fushave respektive, institucioneve lokale dhe pushtetit vendor”, ka thënë Klosi.

“Bashkë me dosjen e nominimit është tashmë dhe suplementi i Planit të Menaxhimit të rajonit të Liqenit të Ohrit, që do të kontribuojë në ruajtjen e trashëgimisë natyrore dhe kulturore të zonës, duke siguruar, bashkëpunuar dhe shkëmbyer eksperiencën në kontekst ndërkufitar”, ka shtuar më pas.

Mbi këtë çështje ka folur edhe zëvendësministri Hajrulla Çeku.

“Shqipëria që duam është vend i vlerave të jashtëzakonshme kulturore dhe natyrore. Edhe një nominim për të fuqizuar pozitën konkurruese të shtetit tonë në nivel global”, ka thënë Çeku.

Leave a reply

InfoKult jep informacion 360 gradë për të kaluar kohën e lirë sa i takon artit, kulturës dhe turizmit (në kuptimin e destinacioneve turistike).