Turistët do të kenë mundësi që këtë sezon të ri të vizitojnë nga afër Nimfeun dhe Termat e Bradasheshit që përbëjnë Stacionin romak Ad-Quintum, të vendosura në hyrje të qytetit të Elbasanit.
Këto monumente kanë pësuar një shndërrim të thellë, për shkak të punimeve që janë ndërmarrë në këtë zonë për përmirësimin e tyre.
Ministria e Kulturës ka postuar një mori fotosh pas transformimit të këtij vendi, ku duket pastrimi i bimësisë së lartë e të ulët, vendosja e tendës së mbulimit dhe tabelat informuese që tërheqin turistët drejt këtij destinacioni.
Dikur i lënë në harresë, tashmë Ad-Quintum qëndron më kryelartë se kurrë, për të gjithë ata që duan të shpalosin misteret që ai mbart ndër shekush. Nimfeu dhe termat përbëjnë një kompleks të vetëm arkitektonik, që mendohet se është ndërtuar diku nga shekulli i II-III i erës sonë.